16:57:52
BPlus Tv
Super Fresh
Rwanda Form
KeySoft
Matelas Dodoma
Kamonyi: Umumotari yasanzwe mu mugozi umanitse mu cyokezo cyo ku kabari yapfuye
Yanditswe na: DUSHIMIMANA Elias
2024-11-15 11:52:53 Amakuru
Mu gitondo cyo kuri uyu wa gatanu tariki ya 15 Ugushyingo 2024, Nibwo abaturage batuye mu Mudugudu wa Taba, mu Kagari ka Masaka, mu Murenge wa Rugarika, Akarere ka Kamonyi, batunguwe no gusanga umusore w'imyaka 29 amanitse mu mugozi hejuru y'icyokezo yapfuye.
Bamwe mu baturage barimo abatuye aho nyakwigendera witwa Iradukunda Martin yapfiriye, batangarije BTN TV ko habanje kubaho imirwano mu gicuku cyane cyane ku isaha ya Saa Munani, aho bumvaga induru zivuga bamwe ntibabyitaho kubera ko hari ku kabario noneho batungurwa no kubona uyu nyakwigendera wakoraga akazi k'ubumotari yapfuye apfiriye mu kabari kari ahazwi nko kwa Masumbuko.
Bati" Mu gicuku nka Saa Munani twumvishe aha hantu yapfiriye havuga induru, barwana noneho ntitwabyitaho kuko ari ku kabari noneho tuzagutungurwa no gusanga Dukunda yapfuye, ubwo rero bamwishe ntiyiyahuye bashakishe ababikoze babiryozwe".
Bakomeza bavuga ko uyu Iradukunda Martin yari umusore w'imico myiza gusa akaba yabatunguye ubwo bamenyaga ko aho yapfiriye hacururizaga umugore babyaranye ibituma bakeka ko ashobora kuba yagiyeyo agasangayo abandi bagabo noneho yamufuhira bagahita bamwica bakaza kumumanika mu mugozi nk'uburyo bwo kuyobya uburari ngo umubona agirengo yimanitse.
Umunyamabanga Nshingwabikorwa w'Umurenge wa Rugarika, NKURUNZIZA Jean de Dieu, yahamirije iby'aya makuru itangazamakuru ko bayamenye ubwo ubuyobozi bw'umudugudu wa Taba bwabibamenyeshaga ko hari umuntu usanzwe mu cyokezo yapfuye noneho nabo bagahita babimenyesha inzego zibakuriye zirimo n'iz'umutekano ndetse ko hahise hatangira iperereza ngo hamenyekane ikihishe inyuma y'urupfu rwa nyakwigendera.
Yagize ati" Nibyo koko amakuru twayamenye, Twayamenye ubwo ubuyobozi bw'Umudugudu wa Taba bwabubitumenyeshaga noneho natwe duhita tubimenyesha inzego zidukuriye zirimo iz'umutekano. Ntawashingiraho avuga ko nyakwigendera yiyahuye kuko iperereza ntirirarangira ngo hamenyekane icyamwishe kuko hategerejwe igisubizo cya muganga ubifitiye ububasha cyakora iperereza ry'ibanze rigaragaza ko aho yapfiriye hakoreraga umugore bivugwa ko babyaranye ubwo rero aradufasha kumenya byinshi".
Gitifu NKURUNZIZA wihanganishije umuryango wa nyakwigendera, yaboneyeho gusaba abaturage muri rusange kwirinda amakimbirane ndetse no mu gihe ahari bakajya bagana ubuyobozi kugirango bubafashe kuyahosha ntawe upfuye biturutse kuri yo.
Hahise haterana inama y'igitaraganya
Iradukunda Jeremie/BTN TV i Kamonyi
