22:20:43
BPlus Tv
Super Fresh
Rwanda Form
KeySoft
Matelas Dodoma
Kenya: Abantu 8 bapfiriye mu mpanuka y’indege
Yanditswe na: DUSHIMIMANA Elias
2023-09-20 07:09:37 Amakuru
Ku wa Kabiri tariki ya 19 Nzeri 2023, Nibwo abantu umunani baguye mu mpanuka y’indege y’Igisirikare cya Kenya.
Iyo mpanuka yabereye mu gace ka Lamu ku mupaka wa Kenya na Somalia, aho ingabo za Kenya zikunze gukora ubugenzuzi kubera abarwanyi bo mu mitwe ishamikiye ku mitwe y’iterabwoba ‘al-Qaida’ na ‘al-Shabab’, bakunze kuba bari ku mupaka wa Somalia.
Igisirikare cyatangaje ko iyo ndege ya Kajugujugu y’ingabo za Kenya kirwanira mu kirere yakoze impanuka ubwo yari irimo ikora ubugenzuzi bwo mu masaha y’ijoro.
Itangazo ryasohowe n’igisirikare cya Kenya rivuga ko hashyizweho itsinda ry’inzobere zigiye gukora iperereza ku cyateye iyo mpanuka.
Bamwe mu bagize inzego z’umutekano bavuze ko abasirikare bose bari bari muri iyo ndege, ndetse n’abashinzwe kuyitwara bose bapfuye.
Hari ingabo za Kenya ziri muri Somalia mu rwego rw’ubutumwa bw’Umuryango wa Afurika yunze Ubumwe bugamije gufasha Somalia guhangana n’umutwe w’iterabwoba wa ‘al-Shabab’. Izo ngabo za Kenya zoherejwe muri Somalia mu mwaka wa 2011, ariko ubu hari gahunda yo kuvana izo ngabo mpuzamahanga muri Somalia, kuko ingabo za Somalia zimaze kugira ubushobozi bwo kwirindira umutekano.
Umutwe wa Al-Shabab wakomeje kugaba ibitero muri Kenya mu mezi ya vuba, byica abantu batari bake, nyuma y’igitutu cy’ibitero ugabwaho n’ingabo za Somalia, byatangijwe cyane cyane nyuma y’itorwa rya Perezida wa Somalia, Hassan Sheikh Mohamud, muri Gicurasi 2022.
