Umuntu uzatanga Abukar Ali Adan uyobora umutwe wa Al Shabab azahembwa na Amerika Miliyoni $5

Ku wa Kabiri tariki ya 17 Ukwakira 2023, Nibwo ?Leta Zunze Ubumwe za Amerika zashyizeho igihembo cya miliyoni $5 ku muntu wese uzatanga amakuru azatuma hafatwa umuyobozi w’umutwe wa Al Shabab, Abukar Ali Adan.

Adan usanzwe ari Umuyobozi wungirije wa Al Shabab, yashyizwe mu byihebe mpuzamahanga mu 2018, akaba agira uruhare rukomeye mu guhuza amashami atandukanye y’uwo mutwe n’undi mutwe w’iterabwoba wa Al Qaeda.

Al Shabab ni umutwe umaze imyaka isaga 15 warazonze Leta ya Somalia.

Muri 2011-2012, Uyu mutwe warushijwe imbaraga n’ingabo za Leta n’amahanga, uva mu bice by’umujyi wimukira mu bice by’icyaro ari naho ukunze kuva ugaba ibitero ku bice bitandukanye nkuko ikinyamakuru TheEastAfrican kibitangaza dukesha iyi nkuru.

Minisiteri y’Ububanyi n’Amahanga ya Amerika igaragaza uwo mutwe nk’ikibangamiye amahoro mu ihembe rya Afurika ndetse n’inyungu z’icyo gihugu n’abafatanyabikorwa bacyo.